| 細欣's profile細欣的細世界PhotosBlogLists |  Tools  Help |
多謝你，讓我學懂了...這一年來，學了些甚麼？
1. ホモ
 2. 「唔得」
3. 東方不敗
 4. 「怪」
5. 嘿嘿笑
6. 一個飲樣等生仔
8/3/2006 新相機試相好耐未上黎post文了，今晩上黎post文，主要係31/7去左濕地公園，用左部LX1影左d相，想放上黎同大家分享下。
最近個人好虛榮，前幾個月買左部LX1，貪佢有得影16:9既28mm相，效果就一半半啦。
要讚既係16:9真係一流，畫面夠晒wide，成張相既效果盡量表現晒28mm既視野，4:3既相真係冇得比。
彈既係部機太多noise，影日頭冇乜野，夜晚就不敢恭維...
LX2第4季會出，有成1000萬像素，個mon亦係2.8吋16:9，聽落好吸引，但唔該解決左noise既問題先。
睇睇試相 3/31/2006 納悶...今日天氣陰陰沉沉，正好代表我而家既景況—納悶… 最憎經常處於等待既狀態，等人、等巴士、等死、等指令… 等指令令人好無奈，究竟下一步應該點做、點行？完全唔到自己控制，要等人下指令，自己先可以做下一步，點解唔可以自己決定點行呢？ 但…如果可以決定點行，又點會出現而家無奈、納悶既景況… 人...真係好矛盾... 2/20/2006 向雪國出發北海道，是令人嚮往的地方，四季鮮明，春天可欣賞櫻花，夏天的薰衣草特別醉人，10月下旬，也可在漫天紅葉下散步，對香港人來說，在北海道渡過白色聖誕更是人生必享樂事。今次選擇1月中到北海道，雖然沒有白色聖誕的浪漫，但趁著假期，可以到雪國一遊，都令人感到興奮。
過去幾年因為職業關係，已經習慣了自己一個在異鄉出Trip，同時亦怕了跟團太多規限：晨早6點幾Morning call，每一個景點逗留一個鐘就走人，每餐都要食別人所限定的菜式等，還是自己買Package，自選定行程好。由於Budget有限，只能以5天時間遊走北海道。亦因時間有限，也只能選擇遊札幌、小樽和登別。購買了國泰假期的4天札幌Package，另加一晚酒店，選國泰是因為直航機，可以省點時間，無需在機場和飛機上呆等。最後，連埋乜稅物稅都只是$6,500以下，都算Acceptable。
行程 Day 1 香港→札幌 Day 2 札幌→小樽→札幌
Day 3 札幌→登別→札幌
Day 4 札幌
Day 5 札幌→香港
Day 1 向雪國出發 出發之前一星期，已不斷密切留意札幌的天氣，天氣報告表示日本東北部下大雪，氣溫亦經常處於攝氏零下的度數。對於一向居住溫帶的香港人說，在零下的冰天雪地活動真是一項極大的挑戰，於是特意購買了特厚的禦寒衣物—Columbia兩層褸（有點肉痛），以及一條有綿底的運動褲。
飛機9點幾起飛，一大清早5點幾起身，坐巴士入機場。經過4小時的飛行後，當地時間4點幾到達新千歲空港。過關後，國泰假期已有小姐上前迎接我們。機場裏已開了暖氣，完全不覺寒意，而迎接我們的小姐也只是短裙絲襪，步出機場後，真正感受到北海道的零下氣溫，但這位姐姐依然無懼寒風，滿帶笑容送我們上Shuttle Bus，朝薄野的Tokyu Inn進發。
登上Shuttle Bus後便開始盤算抵步後的策略。預算酒店Check In後，便到札幌JR站的旅客觀光詢問處購買第二天的小樽火車套票及第三天往登別的溫泉連火車套票。因詢問處6點半就關門，一路上不斷塞車，司機又因雪地濕滑而慢駛，最終在Shuttle Bus內呆了個半鐘（6點）才到達酒店。匆匆忙忙Check In後，便到薄野地鐵站坐地鐵到札幌JR站。
最終趕得及在詢問處購買套票。起初還擔心與日本人溝通有問題，雖然讀了一年日文，但仍只是小學生程度，對此不大幫助。幸好詢問處內的服務員能操流利普通話，溝通沒有大問題，最後快順利買到兩款套票。
套票一：小樽往返札幌JR及地鐵套票，一日內任坐，售價$1,500yen。 套票二：登別至札幌JR來回車票、登別JR站至溫泉酒店來回巴士票、第一滝本館溫泉入場票及午餐，盛惠$4,900yen。
買完套票後，行了JR Tower附近一會，當是第一日的探路吧。先朝JR Tower外的Loft及Seibu進發。Loft和Seibu內設有林林總總的攤位，有港人熟悉的牌子，Porter、Blue Label、I.T.的牌子等，不要以為只可在東京購物，事實上在札幌也可享受到東京的購物樂趣，加上旅行當日是日本新年的大減價季節，一入到百貨公司，便開始手指大動，忍不住也要來一次Window Shopping。
晚飯時間，回到薄野的大街上。看過很多旅遊書，北海道有4大推介美食：拉麵、長腳蟹、湯咖喱及成吉思汗烤肉。提到食蟹，更加要到「えびかに合戰」食蟹放題。一心走上薄野的「えびかに合戰」本店碰碰運氣，可惜，當晚全店爆滿，就連服務員也無暇迎接新客。唯有退而求其次，選了「かに大將軍」，雖然沒有放題，但最後也選了一Set蟹宴，總共有10個餸，包括蟹しゃぶしゃぶ、蟹刺身、蟹肉餃…好味到不得了，簡直不能用筆墨形容。
就這樣，便捧著滿載長腳蟹的肚子進睡了… 12/19/2005 阿仙奴再見睇左多年英超，近幾年阿仙奴可算係威盡，但今屆同摩連奴、賓尼兔比下去。近兩場波輸左，可見韋拉離隊之後，對阿仙奴影響深遠，要亨利單天保至尊，係咁體力化既聯賽上，似乎有d為難。
對車仔前大家都寄望阿仙奴可以沖散車仔，誰不知，開賽15分鐘就已經注定阿仙奴敗局。欠缺防中，打法欠硬朗正是阿仙奴敗陣既致命點。
車仔羸波之後，今屆應該冇乜邊隊波可以阻到佢。而家已經唔敢望曼聯可以拎冠軍，只係望可以縮短兩隊之間既距離。 12/4/2005 終於考完試今日終於考完試，重拾番幾年前考會考既心情，興奮、緊張、眼訓。
尋晚只係訓左3個鐘就起身去考試，咪誤會，唔係因為溫書搞到咁夜，而係為左睇傑斯復出、慶祝曼聯贏波。睇完波好興奮，一望鐘，大鑊，3點了，8點半要入場考試，即是6點要起身，7點坐車去九龍塘。
去到試場，好有會考Feel，d考生好努力溫書，而我呢，本來想拎本notes出黎搵，點知，本notes漏左係屋企，哈哈...算啦，合唔合格都算了，唔好俾咁大壓力自己。
坐埋位等開考，本來以為監考員會用日文宣布開考，點知，全程都係廣東話。文字呢Part so far so good，唔太擔心。反而最怕係聽解，點知，錄音講得出奇地慢，仲要全份卷冇使役、被動等等句型。最後讀解亦唔算太難，做完後仲有半個鐘有多既時間淨。
考試結果要等到3月先有，希望合格啦，對自己有個交代。
完成左一個心頭大石，仲有其他事情要煩。
希望快d雨過天清。 11/29/2005 Roadshow，你可唔可以靜d...每日我都好珍惜返工搭巴士0個一個鐘時間，無計，鬼叫自己住得遠，唔想白白0徒左d時間，當然要好好用盡呢一個鐘，盡情訓覺。
今日如常又坐晨早特別班次最後一班，巴士早到左，好彩我今朝都早左出門口，否則肯定送車尾，難為其他乘客，我相信佢地好大機會會miss呢班車。一上車，已經發覺唔對路，架車既Roadshow開得好大聲，大聲過我屋企個電視！有冇搞錯，廣告聲、Viann既叫囂聲、劉華既歌聲簡直係強姦左我對耳！煎熬左15分鐘有多，最後唯有用headphone開行MP3掩蓋d噪音企圖麻醉自己入睡。幸好我都訓得著，最後差唔多落車先開眼。我白白就俾Roadshow浪費左20分鐘！
 不能否認，Roadshow係一個相當好既宣傳渠道，用一個"丁屎"既mon騷擾你視線，有時仲見到「米撈」、「吹水」上Roadshow講下點用數碼產品溝女，唔想睇既，就合埋雙眼。但巴士公司幾醒都有，你唔睇咩，我就逼你聽，你冇可能聽唔到！
救命！ 11/18/2005 肥貓日記我叫Toby，黎左細欣屋企已經有…大約4個月，我估我而家都有半歲大。細欣屋企好食好住，我由最近得0.5kg，肥到已經超過1kg。
食完又訓，訓完又食，係我最大既權利。每日細欣返左工後，雖然有細欣媽媽係屋企陪我，但細欣媽媽成日出街，所以基本上都係得番我一隻貓係屋企看門口。
平時無所事事，除左係屋企跳上跳落，就會玩下玩具老鼠同玩具青蛙。玩具老鼠同青蛙就好似足球咁，俾我練盤球，由大門口盤球到我個廁所，施單朗拿癲佬都唔夠我咁純熟。練完盤球，我就會「呵」番隻玩具老鼠，又咬又抓，爽呀！
最近天氣開始涼，初頭細欣媽媽話整件衫俾我，點知，孤寒到死，淨係俾張毯我，唔俾我扮靚！話晒我都係一個靚女啦，要靚D先溝到貓仔嘛，車，你唔俾衫我，我就扭pat pat，要電到D貓仔暈晒浪！不過最近我聽到細欣同屋企人商量幾時帶我去絕育…唔制呀，你地冇人性架，我一次都未享受過，你地就要「奄」我，太過份喇！ 11/9/2005 考試了下個月要考能力試，雖然近一年讀書都有考試，但始終都係校內試，好 Hea，對上一次考公開試已經唔知係幾多年前既事。餘下只有一個月時間，我連書都冇溫過，可能因為有 d 文型我仲未學，溫唔溫都已經知道唔會高分，所以懶得就懶。
今時今日考試既態度同以前好唔同，可能無壓力卦…回想當年第二次會考英文，又係無乜壓力（其實唔想去考），結果反而升 Grade。今次去考能力試，唔多唔少都有 d 諗住去玩既態度，不過，最唔願就係要晨咁早 8 點半去到九龍塘香島中學考…要去玩都唔好要我咁早起身啦，好難得一個星期日，我要訓呀！ 11/7/2005 ManUtd: Unbeaten Record Finisher車仔40場不敗之身被曼聯打破！再一次證明，乜乜Record都係要等曼聯打破。
捧左曼聯十幾年，近一兩年睇曼聯睇到冇晒癮，輸俾阿仙奴車仔都冇所謂，但對住D弱隊都可以輸，真係睇到把幾火加心酸。
對車仔前兩場波：對米堡同里爾，見到D球員冇Heart，好似完全唔想踢咁，又成日交錯波，已經唔敢期望對車仔會有乜佳作，只係希望唔好輸得咁肉酸。但諗諗下，曼聯咁輸法會唔會係陰謀？好記得上年對阿仙奴之前又係咁，輸左幾場，個個都係睇低曼聯，到正式開賽，又估你唔到，俾曼聯嬴兩粒。今年又係，輸兩場不特止，仲要彈出左醜人堅尼，係自家電視台訪問中不停小隊友，搞到D人話曼聯內訌實死硬。
為左邪一邪車仔，尋日我買車仔贏同和，諗住輸錢當做善事，贏錢的話，就用d錢黎治療心靈創傷。
等到12點終於開波，唔知係咪知恥近乎勇，定係之前扮晒冇Heart，睇落曼聯又幾對辦，仲要三十幾分鐘入埋波添，嘩，係廢柴入波呀，真係估你唔到，廢柴入左波後鏡頭仲要影住堅尼，哈，都幾有心思。史密夫打到好似堅尼上身咁，搞到林伯一楝都冇，又連鏟幾野，好掂！
全場波雖然得一個入球，但就好緊張，好好睇。完場後，摩連奴都讚曼聯值得羸，當然聯賽冠軍係車仔喎，佢都算有風度，同費蛇都算係識英雄重英雄，抵你咁後生就拎歐聯冠軍。 11/2/2005 Toby: 你睇我唔到自從 Toby 黎左我屋企之後，佢就代替左我個鬧鐘，朝朝 7 點鐘就會拍門叫醒我，當然佢唔係怕我唔知醒返工啦，佢點會咁好死，Toby 只係提醒我又係時候餵佢食早餐。
每朝 Toby 食完早餐，例牌都會纏住我對腳，特別係我著鞋時，佢一定會咬住我條鞋帶。有時心急出門口，真係俾佢激死。今朝 Toby 例牌又叫醒我，餵完佢，搞掂好晒著埋鞋準備出門口時，總覺得有d唔自然。原來係 Toby 冇走黎阻住我著鞋，係我好奇怪之際，發覺 Toby 唔見左…呵，佢都算鬼馬咯，捐左係地毯底，以為人地睇佢唔到。
有時會諗，一隻貓係屋企會有乜做呢？會唔會好悶呢？又好似唔係喎，佢連一個MP3機既蓋都可以玩一晚，真係奇怪… 唔好傳染我呀天氣開始轉涼，之前買左既秋冬裝終於可以拎出黎著。唔知係我心理作用，定係我無記性，今年秋天好似特別遲到。
有人問我最近有冇睇新聞，問我最近邊單新聞最熱，諗左一陣，反應係「黃仁龍」，「叮！錯了」呵，原來我估錯左，Sorry，我唔鍾意估人地諗乜，所以要求對方點我一條明路。結果，對方話近期最熱新聞係「禽流感」。
哦，原來係「禽流感」。
可能兩年前沙士搞到好大鑊，總覺得今次煲呔曾唔會好似老董咁笨，應該會好小心，因為香港唔可能再承受咁大既打擊。
講開病，最近好似成日病，身邊好多人都病，佢地病完就到我病，咁就loop死左。唉，我隔離位仁兄又包雲吞，我估今次我又走唔甩了… 10/25/2005 思想上的錯誤經過10輪英超賽事，車仔終於失分成為今個星期0既矚目新聞。不過令我更加留意的並唔係車仔失分，因為車仔個勢太強，失一兩分俾你又有乜所謂，今個星期最好睇的，當然係皮里斯球玩野12碼。
唔直接射，輕輕搓一下，然後俾亨利後上射，點知，球證話犯規，俾番個罰球曼城。首先聲明，我冇賭波。上網睇到好多人鬧皮里斯，搞到佢地輸波膽。我睇完覺得好好笑，因為我孤陋寡聞，未見過咁樣射12碼。雖然事後亨利話咁樣射12碼係向告魯夫致敬，但我一d都唔覺，覺得佢地玩野居多，想表現自己，仲犯左思想上既錯誤。
身邊好多人都經常犯思想上既錯誤。唔係唔俾犯，但犯錯都要承認，唔認之餘，仲要諸多辯駁，呢d最乞人憎。
p.s. 終於天涼，又可以每日呢個時候見到咸蛋王了... 9/12/2005 米老鼠！自由行係你屋企小便呀！Disneyland 終於開幕，其實唔係太有衝動去，可能因為已經去過東京 Disnseyland 兩次，又或者聽到朋友講香港 Disneyland 太細，所以冇乜藉口要自己去，最多可能夜晚坐地鐵去到 Disneyland 門口免費睇下煙花好過。
未開張之前，報紙已經日日幫 Disneyland 做晒免費宣傳，又話有乜故障，又話要排長龍。講真，故障就唔抵幫，但排隊呢件事，香港人就有d要求太高。雖然只係去過東京 Disneyland，唔算係好有經驗，但我只知，即使日本既 Disneyland，都一樣要排隊，無論玩乜遊戲，食野，一樣要排隊。香港人唔好以為自己俾左三幾百出黎，就好似大 Q 晒，入到場就l即刻有得玩。以前去海洋公園玩過山車又好，海盜船又好，咪一樣要排隊！
你唔好話我唔幫自己人。好似 Disneyland 要香港d食環署衛生邦除帽除扣針，真係離晒譜！都唔知有冇搞錯，你憑乜要執法人員除帽？簡直係侮辱！咁搞法，係咪話俾人知 Disneyland 係香港插左大美國主義支旗？
今日開幕，唔好話我衰，我真係想睇下有冇蝦碌事發生。不過由開幕儀式到放閘俾人玩，一切都好順利。對我黎講，912 Disneyland 開幕，香港人似乎點都唔夠一班自由行咁熱切期待。一班自由行好似前世未見過米老鼠咁，一早買晒飛等入場，不過，唔該呢班自由行尊重下自己身份，唔好丟自己面，大佬，雖然人多，去廁所要排隊，但都唔好因為一句細路仔細忍唔到做藉口，係街邊周圍小解先得卦！
黎得香港，唔該守下香港既規矩，要小解唔該去廁所，唔該排隊唔好打尖。你地咁搞法，Disneyland 有幾靚都冇用啦，俾你班人影衰晒！ 8/23/2005 貓貓and龜龜屋企一下子多左兩個新成員，龜龜同貓貓。
龜龜黎到我屋企已經有好幾個月，由最初只係食鯪魚肉，最後搞到食蝦、魚，仲有遙柱... 佢既重量似乎係非Linear上升，真係好嚇人。
貓貓到步只係2個星期，第一晚叫個不停，不停叫阿媽，經過悉心愛護之後，已經變得非常嗲，仲將屋企變成自己遊樂場，周圍跑，周圍跳。見到佢咁開心，真係有d安慰，當初仲好怕佢唔適應環境，佢唔肯訓搞到我都訓得唔安樂。
今晚，貓貓又周圍跑，一見到我返黎，就撲埋黎要抱，佢呀，仲聞我隻腳指... 哈哈，衰妹，唔好亂聞先得架！
8/9/2005 很愛很愛你－劉若英想為你做件事 讓你更快樂的事
好在你的心中 埋下我的名字
求時間 趁著你 不著意的時候
悄悄地 把這種子 壤成果實
我想她的確是 更適合你的女子
我太不夠溫柔 優雅成熟懂事
如果我 退回到 好朋友的位置
你也就 不再需要 為難成這樣子
很愛很愛你 所以願意
捨得讓你 往更多幸福的地方飛去
很愛很愛你 只有讓你
擁有愛情 我才安心
看著她走向你 那幅畫面多美麗
如果我會哭泣 也許因為喜歡
地球上 兩個人 能相遇不容易
作不成你的情人 我仍感激
很愛很愛你 所以願意
不牽絆你 往更多幸福的地方飛去
很愛很愛你 只有讓你
擁有愛情 我才安心 |
|
|
